O portavoz de Vivenda, Jaime Castiñeira, lembrou que o Código Técnico de Edificación establece as esixencias mínimas de eficiencia enerxética que deben reunir os edificios. Castiñeira demandou deixar aos axentes que interveñen na edificación para procurar a solución máis eficiente segundo as circunstancias específicas
O portavoz de Vivenda do Grupo Popular, Jaime Castiñeira, avogou este mércores no Parlamento pola “liberdade do proxectista e o arquitecto á hora de deseñar os edificios e non pola imposición dos chamados tellados verdes sen ter en conta as posibilidades que ofrece a evolución tecnolóxica e as circunstancias específicas de cada lugar”.
Castiñeira lembrou que o Código Técnico de Edificación, aprobado polo Real Decreto 314/2006, establece as esixencias básicas de aforro enerxético a través de obxectivos, límites, metodoloxías ou especificacións, pero non a través de imposicións ríxidas, como serían os tellados verdes.
CONSUMO ENERXÍA NULO EN 2020
Deste xeito, o portavoz popular sinalou que se estaría “coartando a necesaria liberdade dos axentes que interveñen na edificación para procurar a solución máis eficiente segundo as circunstancias específicas e acadando os obxectivos previstos no Código Técnico de Edificación”.
Jaime Castiñeira apuntou, ademais, que o Real Decreto 235/2013 incorpora a directiva europea que esixe que os edificios que se constrúan a partir do 31 de decembro de 2020 sexan de consumo de enerxía case nulo. No caso de edificios públicos, este prazo adiántase dous anos.