Imprimir

Gómez Noya, prata na proba de Cidade do cabo das Series Mundiais

Stadio Sport | 27 de abril de 2015

Fernando Alarza foi quinto nunha proba espectacular cun Alistair Brownlee brillante

 

Javier Gómez Noya logrou a medalla de prata na cuarta proba das Series Mundiais 2015, que se celebrou este domingo en Cidade do Cabo (Sudáfrica). Foi unha proba dunha enorme calidade, con dous galegos entre o top-five, xa que Fernando Alarza logrou a quinta posición. O protagonista da proba foi Alistar Brownlee, que regresaba á competición despois de moitos meses por lesión, e fíxoo amosando unha enorme superioridade, a pesar de que caeu na carreira a pe, tras un tropezón con Gómez Noya.  

Houbo novidades antes de que os deportistas saíran a competir. A organización veuse obrigada a reducir á metade a distancia na natación por culpa das baixas temperaturas da auga (en torno aos 11 grados). Ademais, non participaba na proba Richard Varga, que é o absoluto dominador deste sector, nin Jonathan Brownlee, líder provisional do mundial e gañador de dúas probas. Desta forma, non houbo distancias importantes ao saír da auga e entrar na T-1, de onde saíron en cabeza os favoritos con Alistair e Javier ao fronte, e moi preto un Fernando Alarza disposto a demostrar que ía ser protagonista. Por detrás, pero moi preto, outro galego, Pablo Dapena que fixo unha natación moi boa e non se descolgou na bicicleta. 

O segmento do ciclismo foi un pouco estraño porque non houbo ataques e marcharon nun grupo amplísimo dunhas sesenta unidades, polo que parecía clave estar ben situado no momento de entrar na área de transición para deixar a bicicleta. Javi Gómez Noya, Alistair Brownlee e Fernando Alarza foron os máis rápidos e enseguida se puxeron en cabeza xunto a Luis Vincent e o sudafricano Richard Murray, que marcaron un ritmo de carreira imposible de seguir polo resto dos triatletas. 

Este quinteto parecía decidido a que o triunfo ía decidirse entre eles e iso a pesar da caída de Alistair Brownlee, tras tropezar con Gómez Noya. Afortunadamente para el o británico non se fixo dano e só perdeu uns metros que recuperou con facilidade. A sorpresa estaba na ausencia de Mario Mola deste grupo e ademais tampouco parecía que tivera opcións de alcanzalo. 

Pouco a pouco Alarza foi perdendo metros cos catro primeiros e no paso pola metade da carreira a pe, parecía estar moi forte Luis Vincent, pero curiosamente foi o primeiro en quedarse atrás no quilómetro 7. Cando só quedaban dous quilómetros para meta Javi decidiu atacar e así tamén perdeu Murray, e quedaron sos Gómez Noya e Brownlee na loita polo triunfo. E de repente, Alistair, que afrontaba a primeira proba da tempada despois de estar case desaparecido por unha lesión á que nunca se lle puxo nome, cambiou de ritmo cunha facilidade impresionante e logrou deixar atrás a Javi coma se este estivese parado e non marcando un ritmo altísimo. Os últimos 1.500 metros de Alistair foron unha exhibición, e rematou cun tempo de 01:39:19. Javi Gómez Noya asegurou unha moi boa segunda posición (01:39:24) e Fernando Alarza fixo top-five, na que posiblemente foi a súa proba máis completa a súa carreira (01:39:51). 

Ademais, hai que destacar que o pontevedrés Pablo Dapena foi 31º cun tempo de 01:42:11 e Luismi Velázquez, venezolano con licenza galega que adestra no Grupo de Alto Rendemento do CGTD, abandonou na bicicleta. 

Trala disputa das catro primeiras probas do Mundial, Javi Gómez Noya é primeiro, mentres que segundo clasificado é Mario Mola –que hoxe foi oitavo- e terceiro Fernando Alarza.  

As Series Mundiais contan este ano con dez probas: Abu Dhabi, Auckland, Gold Coast, Cidade do Cabo, Yokohama, Londres, Hamburgo, Stockholm e Edmonton e Chicago (a gran final). Para a clasificación mundial os deportistas suman os cinco mellores resultados sendo obrigatorio participar na Gran Final, que ten unha puntuación moito máis alta.

Puede ver este artículo en la siguitente dirección http://stadiosport.opennemas.com/articulo/atletismo1/gomez-noya-prata-na-proba-cidade-do-cabo-das-series-mundiais/20150427004357035728.html

Stadio Sport
© 2019 Stadio Sport

Stadio Sport 

Diario Digital de Opinión Independiente

dirección@stadiosport.es  

redaccion@stadiosport.es

publicidad@stadiosport.es


     
Desarrollado por Openhost con:      
OpenNeMaS CMS OpenHost S.L. Opennemas CMS