Imprimir

O BNG entende que estes primeiros 100 días de mandato supuxeron un cambio a respecto das políticas anteriores

Stadio Sport | 22 de septiembre de 2015

O Grupo Municipal do Bloque sinala que a maior parte das 25 medidas non comezaron a executarse. As nacionalistas pensan que é preciso ir máis aló dos anuncios e das boas intencións e é hora de pasar á acción

 

O Grupo Municipal do BNG avaliou, nun almorzo informativo este martes, os primeiros 100 días de mandato municipal. A concelleira nacionalista Avia Veira debullou as 25 medidas para os primeiros 100 días que a Marea Atlántica se comprometeu a cumprir se gobernaba. Deste xeito, clasificou o desenvolvemento destas intencións en tres apartados: as medidas cumpridas, as medidas anunciadas e non cumpridas e as medidas que nin tan sequera foron anunciadas.

Así, Avia Veira destacou que entre os cumprimentos da Marea están a apertura aos grupos da oposición das mesas de contratación, consellos de administración das empresas municipais e outros órganos colexiados, ou a apertura dunha quenda de rogos e preguntas da veciñanza nos plenos da corporación.

A respecto das que están anunciadas, a concelleira aludiu á revisión e modificación do planeamento urbanístico, máis concretamente o plan do Ofimático, ou ao cumprimento da Lei da memoria histórica. Neste mesmo apartado, Avia Veira destacou que, ao borde do cumprimento destes 100 días, o Goberno da Marea tamén anunciou a aplicación dunha tributación progresiva máis xusta, a descentralización da xestión municipal poñendo en marcha os distritos da cidade ou mesmo a elaboración dun plan de emprego. É por isto que a concelleira estima que estes anuncios estarían ben se se executasen de xeito decidido e convida ao Goberno municipal a pasar a acción, indo máis aló da política de xestos.

No que se refire ás actuacións que nin tan sequera foron anunciadas, o Grupo Municipal do BNG sinalou entre as máis importantes a auditoría da débeda do Concello para reducir a súa carga e a aposta pola banca ética, algo que o BNG entende que se podía ter feito cando se solicitou o préstamo de 11 millóns de euros, a publicación das subvencións, contratos, incluídos os menores, ou mesmo os decretos e resolucións dos órganos municipais, incluídos os unipersoais e os dos cargos directivos. Tamén, a concelleira citou que aínda non se creou o Consello Social Municipal e nin se iniciaron os trámites da reforma do Regulamento Orgánico de Participación Cidadá, demanda de vello das nacionalistas. Neste sentido, Avia Veira criticou a renuncia do Goberno Municipal a reformar o ROPC que o alcalde avanzou no acto do xoves pasado de presentación das liñas da Concellaría de Participación.

Por último, a concelleira nacionalista tamén valorou o traballo desenvolvido polo BNG nestes máis de tres meses. “Estamos facendo unha oposición construtiva e coherente, proba diso é que as nosas propostas e mocións no Pleno foron aprobadas; ademais participamos dos debates en positivo engadindo emendas que son aceptadas polas demais forzas políticas”, manifestou Avia Veira. Tamén sinalou que o BNG quere seguir sendo a voz da veciñanza no Concello e ser unha ferramenta para as maiorías sociais, dando voz a quen non a ten, e facendo fincapé en que se solucionen aquelas loitas sociais como a do mercado de Santa Lucía ou a da veciñanza de Elviña, nas que ten participado.

É por iso que o BNG marca como retos máis importantes para o que queda do ano, por unha banda, que do Pleno saian uns orzamentos que prioricen o emprego, a vivenda, os reforzamento dos servizos públicos, a descentralización dos servizos sociais municipais, a dotación económica de programas de igualdade e loita contra a violencia machista, programas de loita contra a pobreza e a exclusión ou investimentos nos barrios. Outros dos retos serán a derrogación da suba do recibo da auga, executada polo PP, a revisión da taxa polo tratamento do lixo e a reformulación da fiscalidade na nosa cidade para que os impostos se paguen de acordo coa capacidade económica de cadaquén, e, polo tanto, pague quen máis ten.

Puede ver este artículo en la siguitente dirección http://stadiosport.opennemas.com/articulo/a-corunha/bng-entende-estes-primeiros-100-dias-mandato-supuxeron-cambio-respecto-das-politicas-anteriores/20150922221317044068.html

Stadio Sport
© 2019 Stadio Sport

Stadio Sport 

Diario Digital de Opinión Independiente

dirección@stadiosport.es  

redaccion@stadiosport.es

publicidad@stadiosport.es


     
Desarrollado por Openhost con:      
OpenNeMaS CMS OpenHost S.L. Opennemas CMS