17:40 h. Viernes, 17 de Noviembre de 2017

Stadio Sport

A Deputación de Ourense estuda colaborar con Cenlle, Punxín e San Amaro para mellorar o abastecemento de auga nestes concellos

A Deputación avaliara a posibilidade de asumir xunto cos concellos a xestión técnica e económica da Estación de Tratamento de Auga Potable que dará servizos aos tres municipios

Stadio Sport  |  30 de Septiembre de 2015 (21:42 h.)
Más acciones:

 O presidente da Deputación de Ourense, Manuel Baltar, reuniuse hoxe cos alcaldes de Cenlle, Punxín e San Amaro, Gabriel Alén, Manuel Vázquez e Ernesto Pérez para analizar con eles os problemas de abastecemento de auga nestes concellos, que solicitaron a colaboración do goberno provincial para mellorar o subministro de auga nestes tres municipios ourensáns. Na xuntanza, que tivo lugar no Pazo Provincial, Manuel Baltar expresoulles aos rexedores que a Deputación de Ourense "estudará as posibles vías de cooperación para levar a cabo actuacións que permitan modernizar a rede de abastecemento nestes concellos", e dixo que a Deputación "está a elaborar un estudo económico para ver o grao de colaboración do ente provincial, tamén coa participación dos tres concellos".

Os alcaldes avaliaron co presidente provincial as obras que se están a executar e que consisten na ampliación do bombeo e tratamento de auga dende a Estación de Tratamento de Auga Potable (ETAP) de Razamonde e a construción de depósitos de cabeceira en cada un dos concellos afectados e as respectivas redes.

Con esta actuación preténdese dar solución definitiva aos problemas que o subministro de auga de consumo humano representa para os concellos de Cenlle, Punxín e San Amaro.

Como a ETAP está ubicada no Concello de Cenlle e a auga vai ser distribuída aos municipios dende a mesma, plantexase o problema da xestión no futuro da citada ETAP, ante o cal Manuel Baltar comprometeuse a que a Deputación de Ourense estudará a posibilidade de asumir conxuntamente cos concellos a dita xestión técnica e económica, dado que esta excede as capacidades materiais, financeiras e persoais dos municipios afectados. "A función principal do goberno provincial e cooperar cos concellos e asistilos, como vimos facendo neste e noutros ámbitos de actuacións", explicou Manuel Baltar, quen engadiu que un ben tan prezado e necesario como a auga "necesita de solucións eficaces e dunha xestión eficiente que garanta o mellor servizo para os cidadáns".