Uxío Abuín, gañador da Copa de Europa de Triatlón de Madrid

Stadio Sport  |  10 de mayo de 2015 (22:38 h.)

Ouro para Susana Rodríguez, na proba mundial de paratriatlon de Madrid. Antonio Serrat, con problemas estomacais, non puido rematar a Copa de Europa

 

O galego Uxío Abuín (Tri Arteixo) logrou hoxe a vitoria na Copa de Europa de Madrid, nunha boa xornada para as e os deportistas galegos. A viguesa Susana Rodríguez logrou o ouro na Madrid ITU World Paratriathlon. O aspecto negativo chegou da man de Antonio Serrat e Melina Alonso: Ambos con problemas estomacais non puideron competir polo triunfo. 

Na elite masculina os galegos estiveron sempre competindo nos primeiros postos. A proba decidiuse na carreira a pe, despois de que chegase á T2 un grupo moi numero de case 40 deportistas, no que se atopaban todos os galegos (Uxío Abuín, Pablo Dapena, Diego Paz, Ricardo Hernández, Antonio Serrat e o mexicano César Saracho –con licenza galega- e o venezolano Luismi Velázquez –tamén con licenza galega-). A pesar de ter gastroenterite Antonio Serrat decidiu saír a competir e estivo entre os primeiros ata que chegou o terceiro sector. Cando comezou a carreira a pe, deuse conta de que non tiña forzas, polo que se retirou. Así, estes dez quilómetros todo tiña que decidirse e nos metros finais Uxío Abuín (01:55:40) logrou impoñerse ao seu compañeiro César Saracho, do Tri Arteixo (01:55:43). Ademais, Ricardo Hernández (do Grupo de Alto Rendemento do CGTD) foi 13º cun tempo de 01:57:54 e Pablo Dapena, 14º (01:57:59). Todos eles lograron puntos para o ránking mundial, ao entrar entre os vinte primeiros da clasificación. Ademais, Diego Paz foi 23º e Luismi Velázquez, 26º.

En elite feminina, Melina Alonso (Tríatlon Ferrol) non puido saír a competir por culpa dunha gastroenterite. Así, a representación do tríatlon galego quedou reducido a Joselyn Brea (venezolana con ficha galega, que está a adestrar en Pontevedra), quen fixo un gran traballo. Perdeu moito tempo na natación, pero logrou remontar moitas posicións na carreira a pe, ata chegar a meta no 19º posto (2:17:10), de forma que logrou sumar puntos para o ránking mundial, por vez primeira na súa carreira deportiva. 

 

IMG-20150510-WA0004

 

Triunfo de Susana. Era a proba máis importante da presente tempada para Susana, xa que se enfrontaba a rivais duras e ademais volvía a competir con Mayalen Noriega. E todo saíu da mellor forma posible. O dúo saíu da auga na primeira posición e con certa distancia sobre a segunda, tanta que a pesar de que perderon case medio minuto na transición seguían ocupando a primeira posición. Na bicicleta, a galega fixo un sector espectacular no que se decidiu todo, xa que abriu unha brecha imposible de recuperar para as súas rivais, así que na carreira a pe estivo moi cómoda, controlando as distancias e aínda así, logrou o segundo mellor parcial. Susana xunto a Mayalen foron as primeiras en meta cun tempo de 01:23:12, o segundo posto foi para  Joleen Chopper (01:23:32) e terceira foi Melissa Reid (01:24:46).  

Hemeroteca